smiley2

Styrktarsjóður Hringfarans styrkir Broskalla um 10 milljónir

Fri, 12 Jan 2024 08:19:50 GMT

Frá viðburðinum í Hátíðasal. Frá vinstri á myndinni eru Ásdís Baldursdóttir og Kristján Gíslason, aðstandendur styrktarsjóðs Hringfarans, Lilja Alfreðsdóttir menningar- og viðskiptaráðherra, Gunnar Stefánsson og Anna Helga Jónsdóttir, aðstandendur Menntunar í ferðatösku, og Jón Atli Benediktsson, rektor Háskóla Íslands. MYNDIR/Kristinn Ingvarsson

Fimmtudaginn 4. janúar 2024 var haldinn fjölsóttur viðburður í Hátíðasal Háskóla Íslands. Á þeim fundi afhenti Styrktarsjóður Hringfarans, hjónin Ásdís Rósa Baldursdóttir og Kristján Gíslason, Styrktarfélagi Broskalla rausnarlegan tíu milljóna króna styrk. Styrkur sem þessi er mjög mikilvægur fyrir áframhaldandi öflugt starf Broskalla og fagnar Styrktarfélagið Broskallar áhuga frá fleiri bakhjörlum fyrir verkefnið.

Á fundinum var fjallað um þá rannsóknavinnu og þróun sem unnin hefur verið innan Háskóla Íslands og verið grunnurinn að verkefnum Broskalla. Aðstandendur verkefnisins, þau Gunnar Stefánsson prófessor og Anna Helga Jónsdóttir dósent, sögðu frá því hvernig umbunarkerfi er hvetjandi fyrir nemendur í viðbót við ávinningin af aukinni þekkingu.

Punktar, Broskallar, sem nemendur safna sér með því að stunda námið geta þau nýtt til kaupa á námsgögnum og ýmsum nauðsynjavörum fyrir sig og fjölskyldur sínar. Styrktarfélagið Broskallar heldur utan um þennan hluta verkefnisins og aflar fjár til þess en ásamt því að vinna sér inn broskalla öðlast nemendur í Kenía um leið kunnáttu sem þarf til að standast inntökupróf í háskóla.

Á fundinum greindu Gunnar og Anna Helga frá velgengni verkefnisins og mikilvægi þess fyrir nemendur í Kenía. Nú þegar hafa 4.000 nemendur í fátækrahverfum og flóttamannabúðum nýtt sér kerfið, m.a. til undirbúnings fyrir háskólanám og hefur m.a. aukið tækifæri stúlkna til náms. Verkefnið er nú rekið á 45 stöðum í Kenía.

Á fundinum tóku til máls, samstarfsaðilar Broskalla í Kenía og greindu frá ávinningi af verkefninu. Hringfarinn, Kristján Gíslason, sagði frá kynnum sínum af verkefninu á einni af ferðum sínum. Styrktarsjóður Hringfarans hafði áður styrkt verkefnið um fimm milljónir króna og bætti nú um betur og styrkti verkefnið um tíu milljónir. Gunnar Stefánsson tók við gjöfinni fyrir hönd verkefnisins.

Sjóðurinn hefur verið helsti bakhjarl verkefnisins ásamt utanríkisráðuneytinu, Háskóla Íslands og Alfreð. Viðburðinum í Hátíðasal lauk með ávarpi Lilju D. Alfreðsdóttur, menningar- og viðskiptaráðherra.

Reynslusaga kennara og nemanda

Thu, 30 Nov 2023 11:59:00 GMT

Frásögn kennara Chol Mabior

Eftirfarandi er frásögn frá Smiley leiðbeinanda Chol Mabior. Frásögnin er birt með hans leyfi.

Frá því ég var ungur hef ég trúað á dugnað og guðrækni. Mér finnst alltaf mikilvægt að breyta rétt við erfiðar aðstæður. Ég gleðst yfir og kann vel að meta vel unnið starf. Í mars á þessu ári (2023), þegar skráningu í skólann okkar var lokið, kom til okkar strákur frá Suður Súdan. Hann sagði mér frá aðstæðum sínum og í kjölfarið ræddi ég við yfirmann minn og bað um inngöngu fyrir strákinn. Hann samþykkti að veita drengnum inngöngu. Strákurinn tók stærðfræði- og tónsmíðapróf og stóðst þau með mikilli prýði. Eftir að hafa tekið aðeins tvö próf þá leiddi hann árangur nemenda skólans, og stóðs þannig þá áskorun sem ég hafði lagt fyrir hann.

Áður hafði sami piltur verið efstur á öllum prófum og það yfir langan tíma. Á því varð nú breyting og varð nýi pilturinn efstur í bekk af 335 nemendum. Við skoruðum því á bekkinn að gera betur en Ali Anur og fá viðurkenningu fyrir. Ég vann náið með nemandanum og ráðlagði honum í náminu. Auk þess að vera leiðbeinandi drengsins skráði ég hann í eflandi nám hjá SmileyCharity, sem miðar að því að styrkja nemendur í stærðfræði og sem námsmenn. Þar reikna nemendur stærðfræðiverkefni á netinu og fá fyrir það Smiley mynt. Nemendur nota Smiley mynt til að kaupa matvöru, föt, skriffæri eða spjaldtölvu eins og sést á myndinni. Þegar við nálguðumst KCPE sagði ég við Benjamín, að ég þyrfti 350 stig frá honum og hann sagði „Kennari, ég geri betur en það“. Ég efaðist ekki um að hann myndi standa við orð sín. Þegar yfir lauk fékk hann 390 stig, eða aðeins 38 stigum frá efstu manneskju í öllu Kenía. Þetta eru skilaboðin sem hann skrifaði mér á Facebook:

„Kæri kennari Chol Mabior, ég er seinn að þakka þér fyrir hjálpina og það sem þú lagðir á þig til að fá pláss fyrir mig í skólanum. Ég hef ekki gleymt því hversu góður þú varst við mig í mars 2023 með því að sannfæra skólastjórann í Cush um að taka mig inn í námið.

Til viðbótar þessu þá hefur þú lagt mikið á þig til að halda okkur virkum í skólanum"

Vinnustofa leiðbeinenda í Kenía

Wed, 01 Nov 2023 21:04:57 GMT

Síðasta heila daginn okkar í Naíróbí buðum við öllum Smiley leiðbeinendum á staðnum á námskeið. Smiley kennslukerfið er í notkun á 43 stöðum í Kenía og voru 1-2 fulltrúa frá hverjum stað, alls 75 manns!

Það var dásamleg upplifun að hitta loksins fólk sem hefur unnið saman síðan á COVID-tímum án þess að hittast í raun, aðeins á fjarfundum.

Við byrjuðum morguninn á kynningu, lýsingu á kerfinu, einnig var notkuninni lýst. Farið var yfir gagnagreiningu sem sýnir viðbrögð nemenda sem lýsa markmiðum sínum og hvernig þeim finnst kerfið sjálft. Að því loknu fengu allir úthlutað æfingu, þar sem átti að leysa nokkrar stærðfræðiæfingar, vinna sér inn nokkra Smiley myntir og nota þær til að borga fyrir hádegismat. Mjög góð leið til að tryggja að allir væru á sama stað í skilningi á kerfinu.

Mikilvægt var einnig að síðdegis fengu allir tækifæri til að lýsa reynslu sinni af Smiley verkefninu. Reyndist þetta mjög fræðandi þar sem við höfum aldrei haft jafn marga Smiley leiðbeinendur á einum stað, allir að vinna í mismunandi aðstæðum, en allir lýsa því hvernig Smiley verkefnið gagnast nemendum þeirra.

,,Ég má læra í stað þess að þrífa"

Sat, 28 Oct 2023 23:40:42 GMT

Meira um Smiley verslanir

Þegar Mary hjá knlsKibera bað okkur fyrst að styðja nemendur á fleiri vegu en með því að útvega spjaldtölvur, höfðum við ekki hugmynd um hvað við vorum að fara út í!

Nokkrum árum síðar eru Broskallaverslanir mjög mikilvægur hluti af starfi Smiley.

Í verslununum geta nemendur notað Smiley mynt sem þau hafa unnið fyrir hörðu höndum, sem þau fá sem verðlaun eftir að hafa klárað heil æfingasett. Þetta hefur á marga vegu sýnt sig að er mikilvægt.

Nemendur koma á Smiley bókasöfn og segja leiðbeinandanum setningar eins og „Ég má læra í stað þess að þrífa í miðbænum“.

Leiðbeinendurnir okkar segja okkur að verslanirnar eru ekki bara mikilvægar fyrir nemandann heldur fjölskyldur þeirra og samfélagið.

Við höfum dæmi um stráka sem vinna sér inn Smiley mynt, kaupa mat í Smiley verslun og gefa matinn til fjölskyldna sem standa hallari fæti en þeirra eigin. Nemendur kaupa þó oftast mat fyrir fjölskylduna sína, eins og á þessari mynd frá KakumaLTGirls.

Búðirnar hafa náð mjög góðum árangri og margar þeirra hafa beðið um meiri aðstoð til verslananna. Sá stuðningur ræðst alfarið af því fjármagni sem verkefnið hefur.

Á meðfylgjandi myndum er aðeins lítið sýnishorn af því hvernig nemendur hafa not af Smiley verslunum. Við eigum von á því að starfsemin aukist til framtíðar og því þurfum við að finna nýjar leiðir til þess að styðja við verslanirnar.

Smiley Vinnustofa

Fri, 20 Oct 2023 08:59:10 GMT

Vinnustofa Smiley með leiðbeinendum

Smiley vinnustofan þann 20. október 2023.

Gert er ráð fyrir rúmlega 50 þátttakendum. Flestir brosleiðsögumenn okkar hyggjast koma.

Tekist hefur að safna fé til að standa straum af ferðum fyrir þátttakendur, leigja sal, ferðast til Kenía og svo framvegis, án kostnaðar fyrir SmileyCharity.

Jákvætt er að kostnaður falli ekki á verkefnið en fyrst og fremst verður þetta kærkomið tækifæri fyrir alla að hittast.

Nýtum reynsluna og lærum hvert af öðru

Vinnustofan mun gefa öllum hópnum tækifæri til að hittast og læra hvert af öðru. Allir okkar ólíku staðir eiga við ólíkar aðstæður að etja og eru á mismunandi stað í innleiðingunni.

Eitt af því sem við ætlum að gera er að láta hvern einasta þátttakanda skrá sig inn með nýjum reikningi, leysa nokkrar auðveldar æfingar, vinna sér inn Smiley mynt og nota til að borga fyrir hádegismat! Að sjálfsögðu er búið að greiða fyrir hádegismatinn í peningum, en æfingin sýnir ágætlega það sem gerist í Smiley verslunum á hinum ýmsu Smiley bókasöfnum og það er mikilvægt fyrir alla brosleiðsögumenn að þekkja ferlið nokkuð vel.

Gert er ráð fyrir að endurskoðunarteymi utanríkisráðuneytisins komi einnig, sem mun veita þeim einstakt tækifæri fyrir fjölda samstarfsaðila okkar.

Við verðum með nokkrar formlegar kynningar en aðaláherslan er á samtal innan hópsins þannig að við höfum nægan tíma fyrir hádegismat og hlé fyrir te og kaffi.

Úttekt styrktaraðila

Sat, 07 Oct 2023 07:17:49 GMT

Styrktaraðilar gera formlega úttekt á verkefninu

Íslenska utanríkisráðuneytið er okkar helsti styrktaraðili. Í því felst að nauðsynlegt er að meta verkefnið, líkt og gert er með öll sambærileg verkefni.

Úttektarteymi hefur verið sett saman til þess að fara yfir verkefnið og þrjú önnur mismunandi verkefni í Kenía, sem öll eru studd af ráðuneytinu. Endurskoðunin mun fela í sér nokkrar vettvangsheimsóknir tveggja fulltrúa ráðuneytisins ásamt aðila frá hverju hinna þriggja verkefnanna.

Skipulag þessarar úttektar er áhugavert þar sem verkefnin starfa víða í Kenía. Val á stöðum sem ætlunin er að heimsækja hefur reynst talsverð áskorun, en það hefur verið leyst með því að heimsækja nokkra Broskalla-staði í vesturhluta Kenía sem eru nálægt stöðum hinna góðgerðarstofnananna.

Þriðja góðgerðarfélagið starfar í Naíróbí þar sem við höfum skipulagt Broskalla vinnustofu, en vinnustofan gefur teyminu möguleika á að hitta mun fleiri Smiley leiðbeinendur en annars væri mögulegt.

Hópurinn okkar er áhugasamur um úttektina. Við leggjum okkur alltaf fram um að gera vel og því eru umbótahugmyndir vel þegnar, ef þær koma.

Starf okkar í flóttamannabúðunum hefur vakið sérstaka athygli og er gert ráð fyrir að það verði skoðað sérstaklega. Einn mikilvægur þáttur í starfi okkar er sveigjanleiki, en starfið hefur á þremur árum vaxið frá því að vera á 4 stöðum yfir í 40 staði. Það er líklega áhugavert fyrir ráðuneytið að sjá hvort hægt sé að stækka verkefnið enn frekar, jafnvel til að aðstoða við menntun á landsvísu eða inn í fleiri flóttamannabúðir.

Smiley og stúlkur í Rescue Wing Ghana

Thu, 21 Sep 2023 11:59:01 GMT

Stúlkur læra og fá fyrir hreinlætis- og tíðavörur

Hér er frétt af síðu samstarfsaðila okkar "The Path of the Girls Club"

Í fréttinni segir:

Starf The Path of the Girls Club verður fjölbreyttara og betra með hverjum degi. Starfið hefur eflst til muna og er starfsfólkið þakklátt fyrir að ´fá tæki, tækni og vetvang fyrir stúlkur að læra. Þökk sé SmileyCharity. Stúlkurnar munu héðan í frá hafa tækifæri til að læra eins og hentar þeim.

Smiley verkefnið miðar að því að nemendur læri námsefni í takt við námskrá í stærðfræði og vinni sér á sama tíma inn tekjur. Tekjurnar munu stúlkurnar nýta til þess að sinna hreinlæti sínu og kaupa tíðavörur.

Við erum mjög þakklát SmileyCharity og Connection Ubuntu og mikla vinnu Erick Aloise forseta og Evans Dorm, varaforseta.

Ný met slegin

Fri, 25 Aug 2023 08:59:01 GMT

Afkastamiklir nemendur

Undanfarnar vikur hafa verið ótrúlegar og höfum við sett ný met.

Í þessari viku og þeirri fyrri voru skólafrí og notuðu nemendur á mörgum stöðum tækifærið til að fara á Smiley bókasöfn, læra, vinna sér inn Smiley mynt og kaupa spjaldtölvur.

Við höfum í rauninni ekki séð svona mikla notkun í langan tíma, að svo margir nemendur nái markmiðinu um eina milljón Smiley mynta á hverjum degi.

Þetta hefur verið áberandi á nokkrum stöðum í Kakuma flóttamannabúðunum sem og í Harvest High School Kariobangi.

Ef litið er á KCSE töfluna á vefsíðu okkar þá sést ein línu á hvert bókasafn. Hægri dálkurinn hefur óvenjulega merkið >50new sem gefur til kynna þann fjölda nemenda sem í þessum mánuði hefur náð efstu einkunn í öllum 50+ KCSE æfingadæmunum. Þær æfingar ná yfir alla stærðfræðinámskrá framhaldsskóla í Kenía. Vefsíðan um árangur nemenda uppfærist stöðugt, svo hún breytist eftir því sem fleiri nemendur hefja eða ljúka námi. Þegar þetta er skrifað, 25. ágúst 2023, hafa samtals 85 nemendur lokið öllum KCSE æfingasettunum.

Sumarið 2023 fór heildarfjöldi nemenda okkar yfir 3000.

Ánægjulegt er að segja frá því að við afhentum þúsundustu spjaldtölvuna nú í sumar!

Mikilvægir styrktaraðilar

Það eru styrkir frá einstaklingum og samtökum sem gera þetta kleift. Í ár eru stærstu styrktaraðilar okkar utanríkisráðuneytið, Sliding Through, Alfred og Rótarýklúbburinn Görðum á Íslandi.

Þetta hefur sannarlega verið gott sumar.

Smiley í flóttamannabúðum í Kenía

Mon, 01 May 2023 08:33:00 GMT

Kakuma Community Library var fyrsta velgengnissaga okkar, sem tengist flóttamannabúðum.

Núna eru yfir 40 staðir í Afríku sem nota Smiley kennslukerfið í gegnum góðgerðarstarfið okkar. Flestir þeirra eru í Kenía og flestir eru sýndir á meðfylgjandi mynd.

Á myndinni kemur fram að þeir staðir sem eru í efra vinstra horni myndarinnar eru í flóttamannabúðunum í Kakuma.

Þegar þetta er skrifað eru 7 staðir í flóttamannabúðunum í Kakuma sýslu. Sex þeirra eru í Kakuma flóttamannabúðunum og einn er í Kalobeyei.

Eins og sést hér á eftir eru þrír staðir nýlega opnaðir, en þar eru 4-5 nemendur sem hafa prófað kerfið á fyrstu dögunum:

Skólar fyrir stúlkur

KakumaLTGirls er heimavistarskóli fyrir eldra skólastig (e. Lifeworks Tumaini Boarding Girls Secondary School). Enginn nemandi hefur unnið sér inn 1 milljón Smiley mynta og þó að 18 reikningar hafi verið virkjaðir er töluverð vinna framundan áður en fyrsti nemandinn klárar allar KCSE æfingarnar og þá þénað nóg til að kaupa spjaldtölvu.

KakumaOLGirls er einnig heimavistarskóli fyrir stúlkur í eldri bekkjum grunnskóla (e. Our Lady's Girls Boarding Secondary School). Sá skóli bættist við í þeirri viku sem þetta er skrifað.

KakumaRW er rekið af Rescue Wings. Þau hafa staðið sig mjög vel og hafa nokkrir nemendur unnið sér inn 1 milljón Smiley mynta. Hins vegar hafa nemendur ekki lokið við KCSE efnið og Rescue Wings hafa ekki enn selt þeim spjaldtölvur. Um leið og það gerist verða fleiri spjaldtölvur sendar til þeirra.

KakumaYD er Kakuma Youth Drive, önnur viðbót þessarar viku.

KalobeyeiBHFGirls er heimavistarskóli fyrir stúlkur í Kalobeyei og rekinn af Big Heart Foundation, en þau bættust einnig við í vikunni.

Ánægjulegt er að af sjö stöðum, eru þrír stelpnaskólar! Okkur er alvara með markmiði okkar um að að minnsta kosti 50% útskriftarnema séu stúlkur.

Ef þú hefur áhuga á gagnagreiningum eða lýsigögnum eru ýmsar upplýsingar skráðar í skrá á https://libraries.tutor-web.net/tables/mapdata.txt og okkur þætti vænt um góðan R kóða til að búa til betri gröf.

Nánari upplýsingar er að finna á vefsíðu með tölfræði um verkefnið, á https://libraries.tutor-web.net

KakumaAdIYD2 eru velferðarátak fyrir ungmenni (e. The Advocacy Initiative for Youth Development) . Þau hafa fengið úthlutað 50 reikningum, þar af hafa 39 verið virkjaðir. Einn nemandi hefur unnið sér inn eina milljón Smiley mynta.

Ef þú skoðar vefsíðuna, sem vísað er í hér að ofan, muntu sjá að einn nemandi hefur nú þegar keypt spjaldtölvu. Á þeirri síðu sérðu líka að KakumaAdIYD2 hefur fengið 15 spjaldtölvur, þ.e.a.s. 10 fleiri en fyrstu 5 sem við byrjum venjulega á. Þetta er eðlilegt verklag : Þegar nýr samstarfsaðili hefur sýnt fram á að hann geti hvatt nemendur á þennan hátt, sendum við strax fleiri spjaldtölvur.

KakumaCL er Kakuma Community Library. Þeir voru fyrsti staðurinn okkar í Kakuma flóttamannabúðunum. Eins og sést hafa þeir unnið frábært starf og 41 nemandi hefur þénað yfir 1 milljón Smiley myntir.

Smiley verslanir, jákvæð viðbót

Tue, 25 Apr 2023 08:38:26 GMT

Smiley verslun er nemendum til hagsbóta

Í gegnum Smiley verkefnið læra nemendur stærðfræði í Smiley bókasöfnum. Með því að leggja stund á námið og komast áfram í námsefninu fá þau Smiley mynt (Broskalla) sem þau geta notað til þess að kaupa ýmsa hluti í sérstökum Smiley verslununum.

Nemendur nota Smiley kennslukerfið til að læra og í gegnum það geta þau unnið sér inn Smiley mynt sem geymd er í rafrænu veski.

Fyrsta Smiley bókasafnið byrjaði á skrifborð í Kibera bókasafninu, knlsKibera. Þar gátu nemendur keypt ávexti, snakk, netaðgang eða dömubindi fyrir Smiley mynt. Í upphafi voru aðeins örfáir hlutir seldir á þessum bókasöfnum. Einhver sá um að kaupa vörur í hefðbundinni búð og selja í Smiley verslun fyrir Broskalla. Þegar nemendur hafa gert sín kaup með því að nota Broskalla úr rafræna veskinu sínu endurgreiðir SmileyCharity leiðbeinandanum fyrir vörurnar. Um leið fer samsvarandi upphæð út af reikningi Smiley verslunarinnar.

Í hverri viku athugar SmileyCharity stöðuna á rafmyntinni SMLY til að sjá hversu mikið hefur verið lagt inn á Smiley verslun á hverjum stað og millifærir samsvarandi upphæð af kenískum skildingum til Smiley leiðbeinanda sem hefur umsjón með versluninni. Í staðinn fær SmileyCharity mynt (í grundvallaratriðum er góðgerðarfélagið að kaupa til baka broskalla).

Með auknum fjölda Smiley bókasafna hafa nokkrar nýjar leiðir verið prófaðar og innleiddar. Sum Smiley bókasöfn hafa útvíkkað grunnhugmyndina og breytt út af því sem upphaflega var farið af stað með. Í þessari færslu er fjallað um "venjulegar" verslanir, sem starfa í tengslum við skólana eða bókasafnanna.

Hjá New life Africa International í Nakuru (SmileyLibrary NLAFnakuru) var gert samkomulag við verslunareiganda rétt fyrir utan skólann. Verslunareigandinn leyfir nemendum að safna hlutum í versluninni gegn inneign. Starfsfólk á Smiley bókasafninu heldur utanum upplýsingarnar og greiðsla fer fram þegar peningarnir hafa verið sendir.

Hjá keníska þjóðarbókasafninu í Moyale (SmileyLibrary knlsMoyale) hefur Smiley leiðbeinandinn gert samkomulag við eiganda söluturns og geta nemendur leyst út broskalla sína til að kaupa ýmsa hluti eins og sykur, maísmjöl, matarolíu, dömubindi, bækur, penna, mjólk og svo framvegis. Sunnudaginn áður en þetta var skrifað keyptu nemendur hrísgrjón, matarolíu, hitabrúsa, sykur o.fl.

Skólar hjá Schools of Hope, þar sem eru Smiley bókasöfn, hafa gert samninga við umsjónarmenn skólanna um að reka verslanir. Þessar verslanir eru staðsettar fyrir utan bókasöfnin. Hver og einn skóli hefur umsjónarmann sem er ólaunaður sjálfboðaliði og sumir þeirra reka líka verslun nálægt bókasafninu. Í Mashimoni (SmileyLibrary MashimoniSoH) er t.d. einn umsjónarmaður sem á búð rétt við bókasafnið. Samningur hefur verið gerður um að Smiley nemendur geta notað þessa búð til að kaupa matvæli.

Það sem helst ávinnst með þessu fyrirkomulagi er að Smiley nemendur eru ekki bundnir við sérstakar vörur sem Smiley leiðbeinendur velja, heldur er þeim frjálst að nota tekjur sínar til að kaupa hefðbundna hluti í Smiley verslun.

Áhrifin eru alveg ótrúleg. Flestir nemendur virðast kaupa mat fyrir fjölskyldur sínar. Sumir nemendur gera matarinnkaup og gefa til fjölskyldna í neyð, í sínu hverfi. Í nokkrum tilfellum upplýsa nemendur bókasafnsfræðinga um að þeir hafi nú frelsi til að læra frekar en að vinna þar sem þeir sjá fjölskyldum sínum fyrir mat á þennan hátt.

Hringfarinn og Broskallar vinna saman

Fri, 29 Apr 2022 08:52:30 GMT

Frétt af vef HÍ um samvinnu og styrk frá Hringfaranum

Styrktarfélagið Broskallar, sem hverfist í kringum kennslukerfi í raunvísindum sem vísindamenn við Háskóla Íslands hafa þróað, tók á dögunum við fimm milljóna króna styrk frá Hringfaranum Kristjáni Gíslasyni sem nýttur verður til þess að hjálpa nemendum á fátækustu svæðum Afríku að komast í háskóla. Fyrir tilstilli styrktarfélagsins, bakhjarla þess og kennslukerfisins gátu nemendur í Kenía m.a. sótt sér menntun þrátt fyrir að skólum í landinu hefði verið lokað vegna kórónuveirufaraldursins.

Kennslukerfið nefnist tutor-web og hefur að geyma kennsluefni, m.a. í stærðfræði, tölfræði og tölvunarfræði, ásamt æfingum sem aðstoða nemendur við að tileinka sér námsefnið. Kerfið þróuðu Gunnar Stefánsson, prófessor við Raunvísindadeild HÍ, og Anna Helga Jónsdóttir, dósent við sömu deild, í samstarfi við tölvunarfræðinga. Það hefur undanfarinn áratug verið nýtt í tölfræði- og stærðfræðikennslu bæði í Háskóla Íslands og framhaldsskólum hér á landi og sömuleiðis í skólum í Kenía í gegnum verkefnið „Menntun í ferðatösku“ (e. Education in a suitcase) sem sett var á laggirnar í samstarfi við þarlenda fræðimenn.

Umbun í formi Broskallamyntar

Tutor-web hefur að geyma umbunarkerfi sem felst í því að nemendur sem standa sig vel í verkefnum vinna sér inn rafmyntina Broskalla (e. SmileyCoin) sem hægt er að geyma í rafrænu veski og nýta má til að kaupa vöru eða þjónustu af ýmsu tagi. Styrktarfélagið Broskallar heldur utan um þessa afleiðu tutor-web verkefnisins og er Háskóli Íslands meðal bakhjarla þess og á fulltrúa í stjórn styrktarfélagsins.

„Styrktarfélagið Broskallar safnar fé til að hjálpa nemendum í fátækrahverfum í Afríku, mest í Kenía, til að komast í háskóla með því að gefa þeim tækifæri til að æfa sig og ná þannig þeirri kunnáttu sem þarf til að standast inntökupróf í háskóla. Önnur hliðarstarfsemi er Smiley Invest ehf. stofnað til að auðvelda fjárfestum að styðja við starfsemina í Kenía með því að kaupa Broskalla á markaði. Félagið á þegar einn milljarð Broskalla og á reglulega fundi með fjárfestum til að ná fleiri bakhjörlum,“ útskýrir Gunnar og bætir við að notkun tutor-web kerfisins og Broskallanna hafi verið geysilega mikil.

Starfsemin í Kenía fer fram í gegnum verkefnið „Menntun í ferðatösku“ en það inniheldur spjaldtölvur fyrir nemendur og þjón (server) sem geymir námsefni tutor-web. Það er ekki síst hugsað fyrir framhalds- og háskóla þar sem netaðgangur er takmarkaður og rafmagn óstöðugt. „Styrktarfélagið gaf upphaflega spjaldtölvur í skóla og veitti þannig nemendum aðgang að kennsluefni í kennslukerfinu tutor-web, en þar er m.a. að finna æfingar í námsefni til stúdentsprófs í Kenía,“ segir Anna Helga.

Kerfið nýttist vel í kórónuveirufaraldrinum

Keníumenn fóru ekki frekar en Íslendingar varhluta af kórónuveirufaraldrinum síðustu tvö ár en í Kenía var m.a. gripið til þess ráðs að loka skólum í heilt ár vegna útbreiðslu veirunnar. „Þá færðum við starfsemina í almenningsbókasöfn sem voru ekki lokuð. Þá fá söfnin nokkrar spjaldtölvur sem þau lána nemendum og nemendur fá Broskalla fyrir verkefni sem þau leysa á tölvunum í gegnum tutor-web. Fyrir rafmyntina geta nemendur keypt smávöru eins og ávexti, snarl, matvöru, skafmiða fyrir gagnamagn, dömubindi, matvörur fyrir fjölskyldur sem eiga ekki fyrir mat og jafnvel spjaldtölvuna sjálfa,“ útskýrir Gunnar og bætir við að bókasafnsaðferðin sé nú notuð á um 20 stöðum í Kenía og notendur um 1500 talsins.

Gunnar bendir á að eitt af vandamálum styrktarfélaga í Afríku sé að tryggja að það fé sem safnast fari á rétta staði í Afríkulöndum en með því að nota rafmynt og svokallaðar bálkakeðjur megi tryggja það. „Hver spjaldtölva er t.d. merkt með sínum QR-kóða og nýjar eru ekki sendar á bókasafn nema eldri hafi verið seldar fyrir Broskalla,“ útskýrir hann og bætir við að ekkert kerfi í heiminum sé sambærilegt tutor-web og engin umbun sambærileg við Broskalla sé til í öðrum vefkerfum.

Í kórónuveirufaraldrinum færðu Gunnar og samstarfsfólk starfið í Kenía inn á almenningsbókasöfn. „Þá fá söfnin nokkrar spjaldtölvur sem þau lána nemendum og nemendur fá Broskalla fyrir verkefni sem þau leysa á tölvunum í gegnum tutor-web. Fyrir rafmyntina geta nemendur keypt smávöru eins og ávexti, snarl, matvöru, skafmiða fyrir gagnamagn, dömubindi, matvörur fyrir fjölskyldur sem eiga ekki fyrir mat og jafnvel spjaldtölvuna sjálfa,“ útskýrir Gunnar

Hringfarinn styrkir verkefnið með ýmsum hætti

Hringfarinn Kristján Gíslason ætti að vera flestum landsmönnum kunnur en hann hefur vakið mikla athygli fyrir þætti sem hann hefur unnið um hringferð sína um jörðina og sýndir hafa verið á RÚV. Á ferð sinni um Kenía heimsótti Kristján nokkra þátttakendur í Broskallaverkefninu og gerði því góð skil, bæði í bókinni Andlit Afríku sem kom nýverið út og í fjórða þætti sjónvarpsraðarinnar um Afríkuferðina . Kristján og kona hans, Ásdís Baldursdóttir, hafa enn fremur sett á fót styktarsjóð sem ætlað er að styðja við ýmis málefni, bæði hér heima og úti í heimi.

Sjóður þeirra hefur þegar styrkt tækjakaup fyrir tvö bókasafnanna í Kenía og á dögunum bættu þau um betur og styrktu Broskallaverkefnið um fimm milljónir króna. Markmiðið með stuðningnum er ekki síst að það nái til fleiri staða sem Kristján heimsótti á ferð sinni um endilanga Afríku. Kristján og Ásdís afhentu forsprökkum Styrktarfélagsins Broskalla styrkinn fyrir síðustu helgi.

„Hringfarinn hefur líka tengt saman hjálparstarf ólíkra íslenskra samtaka, t.d. vinnur Styrktarfélagið Broskallar nú með ABC Barnahjálp og Íslensku barnahjálpinni þannig að skóli og heimavist á þeirra vegum hafa fullan aðgang að efni kennslukerfisins í gegnum spjaldtölvur sem Styrktarfélagið Broskallar útvegar fyrir tilstilli Hringfarans. Með þessu samstarfi getum við hjálpað enn fleiri nemendum á fátækustu svæðum heims að komast inn í háskóla,“ segir Anna Helga enn fremur.

Kennslukerfið til fleiri landa Afríku

Verkefni Styrktarfélagsins Broskalla hefur einnig stuðlað að auknum tækifærum fyrir stúlkur til náms í í Kenía. Í Moyale, sem er fátækt og hrjóstrugt svæði við landamæri Eþíópíu, gripu bókasafnsverðir t.d. til íhlutunarverkefnis til að fjölga stúlkum. „Kvenkyns bókavörður var ráðinn og hún tók að sér að ganga hús úr húsi til að útskýra fyrir foreldrum að dætrum þeirra væri óhætt að heimsækja bókasafnið. Við þetta fór hlutfall stúlkna úr 0 í 30%. Þar hafa enn fremur yfir 200 nemendur keypt spjaldtölvur fyrir Broskalla,“ segir Anna Helga.

Auk þess hefur kerfið verið tekið upp í skólum í flóttamannabúðum í Ifo og samið hefur verið um að það verið líka nýtt á bókasafni í Kakuma-búðunum í Turkana-fylki. Frekari landvinningar eru fyrirhugaðir á næstunni. „Verkefninu verður komið á laggirnir í þremur nýjum löndum í ár og næsta ári með styrkjum frá Hringfaranum, fyrst í Eþíópíu en síðan Malaví og Rúanda. ABC Barnahjálp hefur enn fremur ákveðið að prófa kerfið í Búrkína Fasó og þá leitar utanríkisráðuneytið leiða til að koma kerfinu í notkun í Úganda,“ segir Gunnar að endingu um þetta mikilvæga verkefni.